2022-жылдын 17-декабрында Куршабда «Социалдык өнөктөштүк- ийгиликтин өбөлгөсү» аттуу мугалимдердин райондук семинары болуп өттү.
Семинарга КРнын Президентинин Ош облусундагы ыйгарым укуктуу өкүлүнүн орун басары Эрнис Толтоев, Өзгөн раймамадминистрациянын башчысы-акимдин биринчи орун басары Жалал Алиев, «Кыргыз Туусу» улуттук гезитинен Төлөнбай Абдразаков, райБББнүн башчысы Акуш Асанбаев, шаардык БББнүн башчысы Таалай Сайпиев, редакцияга кызмат көрсөтүп келаткан, китепкөй Борончу Көкөев, айыл өкмөт башчылары, айылдык кеңештин төрагалары, ар бир айыл өкмөттөн бирден мектеп директорлору, бирден ата-энелер комитетинин төрагалары катышты.
Катышуучулардын 1-группасын райБББнын кызматкерлери У.Кенеев менен А.Муратовдор, 2-группасын Б.Көкөев менен М.Шамшиевдер жетектеп жүрүштү.
А.Таңатаров мектебинде «Дүйнөнүн шамы-билим, жашоонун шамы-эмгек», «Наристе» балдар бакчасында «Ачык эшиктер» күнү, №5 В.И.Лениин мектебинде «Мектепте алдыңкы технологияларды колдонуу», «Куршаб» балдар бакчасында «Балдарды ар тараптуу жана татыктуу тарбиялоо» деген темаларда сөз болду.
Темалар айтып тургандай катышуучуларга семинар өткөрүлгөн ар бир окуу, тарбия мекемесинде алдыңкы иштер менен сабактык атайын кааналар көрсөтүлүп, педагогдордун иштеринин жалаң гана жакшы тарабы сүйлөндү.
Чындыгында, А.Таңатаров мектебинин окуучулары үч тилде кыргызча, орусча, англисче эркин сүйлөп, көргөндөрү (просмотру) 3 миңден ашкан медиа борбору эсте калды.
А чындыгында Оштон келген мамлекеттик өкүлдүн билдирүүсүндө облус боюнча санарипке өтүү облустун башка райондорунда 60%дан жогору 70-75 %ды түзөт.
Өзгөн районунда (Инфоком) санарип маселеси 32 %ды түзүп, пайыз көрсөткүчү тиги райондордон толук жарым эсепте артта.
Чоң районубуздун окуучулар санына эсептей келгенде жогору балл алган, облустук, републикалык олимпиадаларга катышкан саналуу окуучуларыбыз менен төш какканыбыз менен районубуздун мектептериндеги билим сапаты облуста эң арткы орунда экени айтылууда.
Ошентип эртең мененки кофе-брейки, түшкү тамагы ширин даярдалып, семинардын уюштурулушу мыкты болгону менен ишке жарачу билим- «ток этер» жери төмөн экени аныкталды.
P.S. Чыгыш десең чыгыштын, батыш десең батыштын мамлекеттери ошол эле мындан 20-30 жыл илгери мектептен билим алган окуучуларынын өз өлкөсү үчүн кан-тер берип окуган окуусунун, талбай иштеген ишинин жыйынтыгы менен бүгүнкү күндө алга суурулуп чыгып, дүйнөлүк рейтингде «Азия жолборстору» аталып, батышы «Эң алдыңкы бейпил жашоо» көрсөткүчүн көрсөткөн алдыңкы 10 өлкөнүн сабында турат. (Ал эми дүйнөдө чоң-кичне 250дөн ашык мамлекеттер бар).
Бизде, биздеги билим, тарбияда «патриотизм» деген чет тилдин мааниси жүрөгүнө толук жетпей калган мыкты окуучуларыбыз ошол мыкты мамлекеттердеги жогорку окуу жайларга тартылып, чакыртылып, биздин табият берген тунук шык-жөндөмүн чет өлкөлөрдүн экономикасынын өнүгүүсүнө, элинин чың саламатчылыгына, технологиясынын өнүгүүсүнө күчтөрүн сарптап жатышат.
Эми андайлар аз болсо да алардын ар бири 62 вагондун жүгүн тартчу мыкты окуучу-инсан азаматтарыбыз да…
Жогоруда белгиленгендей, өлкөбүздөгү, анын ичинен биздин Өзгөн аймагыбыздагы билим сапатынын төмөндүгү билим берүү системасындагы кө-өп маселелердин арбындыгында болуп турат.
Эл агартуудагы мударисттер көп жакшы багыттарды күткөн, реформатор, мезгилсиз дүйнөдөн кеткен маркум, мурунку билим берүү, илим министри, профессор Каныбек Исаковго теңдеш чыгаан, революционер, жетик бир эле ата уулдун башчылыгында билим берүү системабызды өз жолуна чыгарууга болот эле…
Канчоро Айдаров.